ໝວດ: ການສື່ສານ.
ປະເພດ: ຂະບວນການ.
ເວລາ: ຂະບວນການຕໍ່ເນື່ອງ.
ການໝຸນໃຊ້: ໃຊ້ໃນຊີວິດປະຈຳວັນ.
ບົດຮຽນການໝຸນໃຊ້ໂດຍ: ສູນບໍລິການຄົນພິການ (Disability
Service Center “DSC”).
“ການສ້າງຄວາມໄວ້ວາງໃຈກັບຜູ້ພິການ ໃນຂະບວນການສຳຫຼວດຄວາມຕ້ອງການ”
ການສ້າງຄວາມໄວ້ວາງໃນເປັນເລື່ອງໜື່ງໃນຂະບວນການສໍາຫຼວດຄວາມຕ້ອງການຂອງກຸ່ມເປົ້າໝາຍຂອງອົງກອນ ເພື່ອໃຫ້ໄດ້ຮູ້ເຖິງຄວາມຕ້ອງການທີ່ແທ້ຈິງຂອງພວກເຂົາເຫຼົ່ານັ້ນ ແລະ ສາມາດຕອບສະໜອງຄວາມຕ້ອງການໄດ້ຢ່າງມີປະສິດທິພາບ ລວມທັງບັນລຸຕາມຈຸດປະສົງທີ່ໄດ້ຕັ້ງໄວ້.
ເປົ້າໝາຍ: ສ້າງຄວາມໄວ້ວາງໃຈໃຫ້ເກີດຂຶ້ນ ແລະ ຜູ້ພິການເປີດໃຈຮັບໂອກາດທີ່ດີ ອີງຕາມຄວາມຕ້ອງການຂອງເຂົາເຈົ້າ.
ຄຳແນະນຳ: · ການສ້າງຄວາມໄວ້ວາງໃຈ ເປັນເລື່ອງທີ່ຕ້ອງໃຊ້ທັງທັກສະການສື່ສານ ແລະ ການວາງຕົວທີ່ເໝາະສົມ ລວມທັງການກຳແໜ້ນ ຈຸດປະສົງຂອງໂຄງການ. · ຄວາມໄວ້ວາງໃຈຈະເກີດຂຶ້ນໄດ້ ເປັນຄວາມຕ້ອງການ ແລະ ຄວາມຮູ້ສຶກຂອງອີກຝ່າຍໜຶ່ງ ບໍ່ສາມາດບັງຄັບກັນໄດ້. |
ເທັກນິກການສ້າງຄວາມໄວ້ວາງໃຈ
· ຕ້ອງມີຄວາມຮູ້, ຄວາມສາມາດ ເລື່ອງຫຍັງແດ່?
ຮຽນຮູ້ທີ່ຈະສື່ສານຢ່າງມີປະສິດທິພາບຄືການສື່ສານທີ່ດີ, ເວົ້າຈາສຸພາບ ແລະ ຊັດເຈນ, ການສ້າງຄວາມເຊື່ອຖືຄືເວົ້າໄປແລ້ວຕ້ອງເຮັດໃຫ້ໄດ້ ແລະ ມີຄວາມຈິງໃຈ ຄົນເຮົາຈະສາມາດຮັບຮູ້ໄດ້ຈາກຄໍາເວົ້າ ແລະ ການກະທໍາ
· ຕ້ອງມີທັດສະນະຄະຕິແນວໃດແດ່?
o ເພື່ອໃຫ້ຜູ້ອື່ນເກີດຄວາມໄວ້ວາງໃຈ. ຕ້ອງມີທັດສະນະຄະຕິໃນທາງບວກຫຼາຍກວ່າທາງລົບ, ຕ້ອງເປັນຜູ້ຟັງທີ່ດີ , ໃຫ້ກໍາລັງໃຈ ແລະ ຄອຍໃຫ້ການສະໜັບສະໜູນ
o ຕ້ອງຮູ້ຢ່າງຊັດເຈນ ວ່າ ເປົ້າໝາຍໂຄງການແມ່ນຕ້ອງການບັນລຸເລື່ອງໃດ, ກຸ່ມເປົ້າມີຢູ່ໃສແດ່.
o ການປະສານງານ ສາມາດເຮັດໄດ້ທັງການຕິດຕໍ່ຫາຜູ້ຮັບຜິດຊອບສ່ວນຕົວໂດຍກົງ ແລະ ການລົງໄປຫາຕົວຈິງເຖິງສະຖານທີ່.
o ເພື່ອສ້າງຄວາມສໍາພັນ, ໃນເບື້ອງຕົົ້ນກໍທັກທາຍສະບາຍດີ ຍິນດີທີ່ໄດ້ຮູ້ຈັກ ທັກທາຍຖາມຂ່າວແບບເປັນກັນເອງ ຖາມເລື່ອງວຽກ ການຮໍ່າຮຽນ ເປັນບົດສົນທະນາທົ່ວໄປໃຫ້ມີການແລກປ່ຽນກັນ ບໍ່ເວົ້າເຖິງເລື່ອງວຽກງານເປົ້າໝາຍຂອງເຮົາທັນທີ.
o ຫຼັງຈາກທີ່ໄດ້ສ້າງຄວາມລຶ້ງເຄີຍຈົນກຸ່ມເປົ້າໝາຍຮູ້ສຶກສະໜິດແລ້ວ ຄ່ອຍໆ ຖາມກ່ຽວກັບຄວາມຕ້ອງຂອງເຂົາ ຢາກຮຽນຫຍັງ ຢາກເປັນຫຍັງ ແລະ ນໍາສະເໜີກ່ຽວກັບເປົ້າໝາຍຂອງເຮົາ ເພື່ອເຊີນຊວນໃຫ້ເຂົາເຈົ້າເຂົ້າຮ່ວມກັນຮຽນ/ຝຶກອົບຮົມ.
· ຈະຮູ້ໄດ້ແນວໃດ ວ່າເຂົາເຈົ້າເລີ່ມໄວ້ວາງໃຈ ແລະ ເປີດໃຈແລ້ວ?
ເຂົາເຈົ້າສະແດງອອກແນວໃດແດ່? ເຂົາເຈົ້າຈະມີທ່າທາງທີ່ປ່ຽນໄປ ເຂົາຈະບໍ່ຮູ້ສຶກອຶດອັດ ເຊິ່ງເຮົາຈະສາມາດສັງເກດໄດ້ຈາກ ການກ້າເວົ້າ, ກ້າສະແດງອອກ, ເຂົາເຈົ້າຈະໂອ້ລົມເປັນກັນເອງ, ເຂົາເຈົ້າຈະສາມາດເປີດເຜີຍ ແລະ ໂອ້ລົມໄດ້ທຸກເລື່ອງກັບເຮົາ ເມື່ອເຂົ້າເຈົ້າໄດ້ມີການໄວ້ວາງໃຈໃນຕົວເຮົາ.