ແບບຝຶກຫັດນີ້ ແມ່ນເຮັດຂຶ້ນມາເພື່ອຝຶກການຟັງ ທີ່ເຮັດໃຫ້ຜູ້ຟັງບໍ່ກະໂດດເຂົ້າໄປແກ້ໄຂບັນຫາໂດຍຕົນເອງ ສ່ວນຫຼາຍແລ້ວ ຜູ້ຟັງມັກຈະຟັງ ແລ້ວຕັດສິນທັນທີ ວ່າຈະຕ້ອງແກ້ໄຂແນວໃດ. ແມ່ນຢູ່ວ່າ ການແກ້ໄຂບັນຫາ ມັນຈະເກີດປະໂຫຍດສູງສຸດ ແຕ່ນັ້ນອາດຈະບໍ່ແມ່ນສິ່ງທີ່ຄົນອື່ນຕ້ອງການ. ໃນຂະນະທີ່ຄົນອື່ນໄດ້ສະແດງຄວາມກັງວົນໃຈຕໍ່ສິ່ງທີ່ເກີດຂຶ້ນ ເຂົາເຈົ້າຕ້ອງການຄົນຟັງ ແລະ ເຂົາໃຈຄວາມຮູ້ສຶກ, ຄວາມຕ້ອງການ ເຂົາເຈົ້າບໍ່ໄດ້ຕ້ອງການໃຫ້ເຮົາຊ່ວຍແກ້ໄຂບັນຫາ.

ໃນແບບຝຶກຫັດນີ້ ຈະຊ່ວຍໃຫ້ທ່ານໄດ້ເຫັນຄວາມແຕກຕ່າງລະຫວ່າງ ການຟັງບັນຫາ ແລະ ບໍ່ມີການສະເໜີແນະການແກ້ໄຂບັນຫາ ສົມທຽບກັບ ການຟັງບັນຫາ ແລະ ໃຫ້ຄຳສະເໜີແນະເປັນໄລຍະ.

ຂັ້ນທີ 1: ຜູ້ເຂົ້າຮ່ວມຈົບຄູ່ ໃຫ້ຜູ້ໜຶ່ງເປັນຄົນເລ່າເລື່ອງ ອີກຜູ້ໜຶ່ງໃຫ້ເປັນຄົນຟັງ.

ຂັ້ນທີ 2: ຜູ້ເລົ່າເລື່ອງເລືອກບັນຫາຂອງຕົວເອງ ເພື່ອຈະໄດ້ເລົ່າໃຫ້ອີກຜູ້ໜຶ່ງຟັງ. ເລື່ອງທີ່ຈະເລົ່າ ຕ້ອງເປັນເລື່ອງທີ່ກຳລັງຊອກທາງແກ້ໄຂຢູ່ ແລະ ສາມາດເລົ່າໃຫ້ຜູ້ອື່ນຟັງໄດ້.

ຂັ້ນທີ 3: ແຈກຢາຍໃບມອບວຽກ. ຜູ້ຟັງບາງຄົນກໍ່ຈະໄດ້ “ການຟັງໂດຍບໍ່ຕ້ອງໃຫ້ຄຳສະເໜີແນະ” ບາງຄົນກໍ່ຈະໄດ້ “ການຟັງໂດຍໃຫ້ຄຳສະເໜີແນະ”. ມອບໝາຍໃຫ້ຜູ້ຟັງອ່ານຢ່າງລະອຽດ ແລະ ອ່ານໃນໃຈ.

ຂັ້ນທີ 4: ຜູ້ເລົ່າເລື່ອງເລີ່ມເລົ່າບັນຫາຂອງຕົນເອງ. ໃຫ້ເວລາ 5 ນາທີ. ຜູ້ຟັງຕ້ອງສະແດງພຶດຕິກຳຕາມທີ່ຂຽນໄວ້ໃນໃບມອບວຽກນັ້ນ.

ຂັ້ນທີ 5: ທຸກຄົນກັບມາລວມກຸ່ມໃຫຍ່ ແລະ ໃຫ້ຜູ້ຟັງແຕ່ລະຄົນບອກວ່າ ຕົນເອງໄດ້ໃບມອບວຽກຂຽນວ່າແນວໃດ.

ຂັ້ນທີ 6: ສົນທະນາ ແລະ ສະຫຼູບສິ່ງທີ່ໄດ້ຮຽນຮູ້.

·       ຕັ້ງຄຳຖາມກັບຜູ້ເລົ່າບັນຫາ ວ່າ “ເຈົ້າໄດ້ຮຽນຮູ້ຫຍັງແດ່? ເຈົ້າຮູ້ສຶກແນວໃດ?”

·       ຕັ້ງຄຳຖາມກັບຜູ້ຟັງ ວ່າ “ເຈົ້າໄດ້ຮຽນຮູ້ຫຍັງແດ່? ເຈົ້າຮູ້ສຶກແນວໃດ? ເຈົ້າຮູ້ຈັກຜູ້ເລົ່າເລື່ອງແນວໃດແດ່? ເຈົ້າຮູ້ສຶກແນວໃດກັບຜູ້ເລົ່າເລື່ອງ?”

ໃຫ້ຟັງຢູ່ງຽບໆ ໂດຍບໍ່ຕ້ອງໃຫ້ຄຳສະເໜີແນະ.

ໜ້າວຽກຂອງເຈົ້າ ແມ່ນ ໃຫ້ຜູ້ເລົ່າເລື່ອງ ໄດ້ເລົ່າບັນຫາຂອງເຂົາເຈົ້າ ໂດຍບໍ່ໃຫ້ເຈົ້າກະໂດດເຂົ້າໄປແກ້ໄຂບັນຫາໃຫ້ເຂົາ. ຟັງແບບງ່າຍໆ ສະບາຍ ສະບາຍ.

ຄຳແນະນຳໃນການຟັງ:

·       ໃຫ້ຢູ່ກັບປັດຈຸບັນ ແລະ ຟັງເລື່ອງເລົ່າຢ່າງຕັ້ງໃຈ. ຖ້າຮູ້ສຶກຕົວວ່າ ບໍ່ໄດ້ສຸມໃສ່ກັບຄວາມຮູ້ສຶກ ແລະ ຄວາມຕ້ອງການຂອງຜູ້ເລົ່າ ກໍ່ໃຫ້ຟ້າວກັບຄືນມາຫາຜູ້ເລົ່າທັນທີ.

·       ຖ້າເຮົາຄິດໄປຫາວິທີການແກ້ໄຂບັນຫາ ໃຫ້ກັບຄືນມາຫາຜູ້ເລົ່າ ໂດຍຟັງນ້ຳສຽງ, ສຳນຽງ, ຈັບຄວາມຮູ້ສຶກຂອງຜູ້ເລົ່າ ວ່າເຮົາສັງເກດເຫັນຫຍັງ.

·       ໃຫ້ໃຊ້ພາສາຮ່າງກາຍ ໃນການສະແດງໃຫ້ຜູ້ເລົ່າເລື່ອງຮູ້ຕົວວ່າ ເຮົາສົນໃຈຟັງຢູ່ ເຊັ່ນ: ພະຍັກໜ້າ, ແນມເບິ່ງໜ້າຜູ້ເລົ່າເລື່ອງ, ສະແດງຄວາມຮູ້ສຶກໄດ້ ເປັນຕົ້ນ.

·       ຖ້າມີອາການຢາກເວົ້າ ຫຼື ຢາກສະແດງຄຳເຫັນ ໃຫ້ໃຊ້ວິທີເບິ່ງລົມຫາຍໃຈ ເຂົ້າ-ອອກ.

·       ຖ້າມີແນວຄິດໃນການແກ້ໄຂບັນຫາທີ່ສ້າງສັນ ໃຫ້ໃຊ້ວິທີຈຳໄວ້ ຫຼື ຈົດໄວ້ ແລະ ກັບໄປຫາການຟັງຕໍ່ໄປ.

ຟັງ ແລະ ໃຫ້ຄຳສະເໜີແນະໄປພ້ອມໆ ກັນ.

ຄຳແນະນຳໃນການຟັງ:

·       ພະຍາຍາມຄິດຫາວິທີແກ້ໄຂບັນຫາ ໃນຂະນະທີ່ຜູ້ເລົ່າກຳລັງເລົ່າເລື່ອງ.

·       ໃຫ້ຄຳເຫັນທັນທີ ຢາມທີ່ເຈົ້າຄິດໄດ້ ບໍ່ຄ້ອງລໍຖ້າໃຫ້ຈົບການເລົ່າ.

·       ຊອກຫາຂໍ້ມູນທາງ google ໄປນຳ ໃນຂະນະທີ່ຟັງ.

·       ບໍ່ຕ້ອງສົນໃຈເລື່ອງພາສາກາຍຂອງທ່ານ ຍ້ອນວ່າ ການສົນທະນາເທືອນີ້ແນໃສ່ແນວທາງແກ້ໄຂບັນຫາ ບໍ່ແມ່ນການການສະແດງອອກທີ່ເໝາະສົມ ຫຼື ການສະແດງອອກທີ່ສົນໃຈຜູ້ເລົ່າເລື່ອງ.